Մայիսի 20-ին ուսումնական այց կատարեցինք  Collège de France, որը բարձրագույն կրթության և հետազոտական պետական հաստատություն է՝ հիմնադրված 1530 թվականին։ Այցի շրջանակներում մասնակցեցինք պրոֆեսոր Դիդիե Ֆասենի (Didier Fassin) դասախոսություններին՝ «Բռնության ձևերը» ընդհանուր խորագրի ներքո։ Այդ օրն ընթերցված դասախոսությունները վերնագրված էին՝ <Ծագումնաբանություններ («Généalogies») և «Գրել նրան» («Écrire»)։ Դիդիե Ֆասենը՝ նշանավոր սոցիոլոգ և մարդաբան է, դասախոսությունների այս շարքով ուսումնասիրում է բռնության բազմազան դրսևորումները ժամանակակից հասարակություններում՝ վերլուծելով դրանց սոցիալական, բարոյական և քաղաքական հետևանքները։
Դասախոսությունների շարքը անցկացվում է Ֆասենի ղեկավարած «Բարոյական հարցերը և քաղաքական մարտահրավերները ժամանակակից հասարակություններում» ամբիոնի շրջանակներում։

 

 

Սոցիոլոգիական մտքի վրա նշանակալի ազդեցություն ունեցող Ֆրանսիացի մտածող Միշել Ֆուկոն 1971 թվականից մինչև իր մահը՝ 1984 թվականը, զբաղեցրել է Մտածողության համակարգերի պատմության (Histoire des systèmes de pensée) ամբիոնի վարիչի պաշտոնը Collège de France-ում:

1970 թվականի դեկտեմբերի 2-ին Միշել Ֆուկոն կարդացել է իր առաջին դասախոսությունը Collège de France-ում, որը հրատարակվել է երկու ամիս անց՝ «Խոսքի կարգը» վերնագրով, որտեղ փիլիսոփան ուսումնասիրում է իշխանության, գիտելիքի և դիսկուրսի միջև եղած փոխհարաբերությունները՝ ընդգծելով այն մեխանիզմները, որոնց միջոցով դիսկուրսը վերահսկվում, ընտրվում, կազմակերպվում և տարածվում է հասարակությունում: Ամեն շաբաթ, սկզբում չորեքշաբթի կեսօրին, ապա 1976 թվականից սկսած առավոտյան, Ֆուկոն հրապարակային դասախոսություններ էր կարդում աշխարհահռչակ այս հաստատությունում։ Այս դասախոսությունները կարևորագույն իրադարձություններ էին. հազարավոր մարդկանց մասնակցությամբ դրանք ստեղծեցին ժամանակակից քննադատական ​​​​հետազոտության չափանիշներ։