Մարտի 26-ին տեղի ունեցավ Համագործակցության հուշագրի ստորագրման հանդիսավոր արարողություն Կրթական հետազոտությունների և խորհրդատվությունների կենտրոնի ու ԵՊՀ Մանկավարժության և կրթության զարգացման կենտրոնի միջև։

Այս հուշագրի ստորագրումով սկիզբ է դրվում նոր հետազոտական ծրագրերի, համաժողովների, միջոցառումների և սեմինարների։ Կողմերը կմշակեն և կիրականացնեն կրթական ոլորտի նոր ծրագրեր, կկազմակերպվեն քննարկումներ, համաժողովներ՝ խոստանալով նոր հնարավորություններ կրթական հետազոտությունների ասպարեզում: Համագործակցության շրջանակներում կիրականացվեն հանրակրթության կրթական նոր չափորոշիչների ներդրման գործընթացի վերաբերյալ ուսումնասիրություններ և մասնագիտական քննարկումներ:

ԵՊՀ-ում Մանկավարժության և կրթության զարգացման կենտրոնը գործում է 2017 թվականից տնօրեն դոկտոր պրոֆեսոր Ն. Հարությունյանի ղեկավարությամբ: Կենտրոնում գործում է Մանկավարժության ամբիոնը, որը ԵՊՀ հնագույն ամբիոններից է․ այն հիմնադրվել է 1921 թ.։ Կենտրոնում գործում է ուսուցման եռաստիճան համակարգ՝ բակալավրիատական, մագիստրոսական և ասպիրանտական։ 2016-2017 ուստարվանից սկսած Կենտրոնը ԵՊՀ որոշ ֆակուլտետներում գործարկել է մանկավարժի որակավորման շնորհման նոր համակարգ։ Մանկավարժի որակավորման լրացուցիչ կրթաբլոկի ներդրման արդյունքում ուսանողները, բացի մասնագիտական որակավորումից, ստանում են նաև մանկավարժի որակավորում՝ ՀՀ ԿԳՄՍ նախարարության կողմից հաստատված՝ մանկավարժի որակավորման շնորհման «240+30» կրեդիտ նոր համակարգով։

Մանկավարժության և կրթության զարգացման կենտրոնի հետ մեր կենտրոնը սկսել է համագործակցել դեռևս 2022թ․ ԵՊՀ-ում տեղի ունեցած Կրթական հետազոտությունների եվրոպական ասոցիացիայի (EERA - European Educational Research Association) տարեկան համաժողովի շրջանակներում (ECER-The European Conference on Educational Research)։

Մեր կենտրոնի փորձագիտական խումբը հեղինակել է հոդվածներ, որոնք տպագրվել են Մանկավարժության և կրթության զարգացման կենտրոնում գործող «Կրթությունը 21-րդ դարում» գիտամեթոդաբանական միջազգային գրախոսվող եռալեզու հանդեսում։

Այս նոր համագործակցությունը հետաքրքիր հնարավորություններ է ստեղծում ուսանողների, դասախոսների և կրթության ու գիտության ոլորտի մասնագետների համար՝ ներգրավվելու նորարարական հետազոտական ծրագրերում և մասնագիտական զարգացման գործընթացում։ Համագործակցությունը թույլ կտա ակտիվ մասնակցություն ունենալ նոր կրթական և հետազոտական ծրագրերում, սեմինարներում և համաժողովներում, ստեղծելով հարուստ միջավայր՝ ինչպես ակադեմիական, այնպես էլ գործնական առաջընթացի համար։