«Հայաստանի երիտասարդները հետպատերազմյան Հայաստանում. հետազոտություն և դիսկուրս» ծրագրի շրջանակում անցկացրել ենք փորձագիտական և խորհրդատվական հանդիպումներ՝ հետազոտական գործընթացը մասնակցային և համապարփակ դարձնելու նպատակով։ Դրանց նպատակն էր ձևավորել գիտելիքի ու քաղաքականության համատեղ հարթակ՝ միավորելով տարբեր դերակատարների՝ երիտասարդության հետ կապված մարտահրավերները,  հնարավորությունները և կարողությունները բազմակողմանիորեն վերլուծելու համար։

Հանդիպումներին մասնակցել են․

- երիտասարդության ոլորտի ակադեմիական համայնքի ներկայացուցիչներ,

- քաղաքացիական հասարակության կառույցներ,

- միջազգային կազմակերպություններ,

- պետական կառույցների ներկայացուցիչներ, որոնք զբաղվում են երիտասարդական քաղաքականության մշակմամբ։

Քննարկումների ընթացքում բարձրաձայնվել են հետևյալ հետազոտական հարցերի կարևորությունը այս նախագծի շրջանակներում․

- ինչպես են հետպատերազմյան իրադարձությունները ազդում երիտասարդների ինքնության, արժեհամակարգերի և ապագայի նկատմամբ վերաբերմունքի վրա,

- ինչպիսի քաղաքական և կրթական գործիքներ են անհրաժեշտ երիտասարդության ներուժը զարգացնելու համար,

- ինչ դեր կարող է ունենալ երիտասարդությունը մասնակցային ժողովրդավարության ամրապնդման մեջ, 

- որոնք են երիտասարդների կողմից տեղեկատվության սպառման առանձնահատկությունները և այլն։

Քանի որ նախագիծը միտված է ոչ միայն գիտական արդյունքների ստացմանը, այլև դիսկուրսի ստեղծմանը, որտեղ երիտասարդների ձայնը համադրվում է փորձագետների և որոշում կայացնողների տեսակետների հետ, հանդիպումների այս ձևաչափը հնարավորություն է տալիս ավելի խորությամբ հասկանալու երիտասարդության պահանջներն ու ձևավորելու քաղաքականության պատասխաններ, որոնք կհամապատասխանեն հետպատերազմյան իրականության առանձնահատկություններին։

Շնորհակալություն ենք հայտնում բոլոր գործընկեր կառույցներին և անհատ փորձագետներին հանդիպումների և կարևոր շեշտադրումների համար։

Մենք շարունակելու ենք իրականացնել նման հանդիպումներ։  

Հետազոտությանը երիտասարդների ակտիվ մասնակցությունը ապահովելու համար հրավիրում ենք մեր հետազոտական թիմին միանալ երիտասարդ հետազոտողների։ 

Հիշեցնենք, որ «Հայաստանի երիտասարդները հետպատերազմյան Հայաստանում. Հետազոտություն և դիսկուրս» նախագիծը իրականացվում է Գալուստ Կիւլպէնկեան Հիմնարկութեան ֆինանսավորմամբ։

Այս աշխատանքում արտահայտված տեսակետները, հեռանկարները և մոտեցումները պատկանում են միայն հեղինակներին և պարտադիր չէ, որ արտացոլեն Գալուստ Կիւլպէնկեան Հիմնարկութեան դիրքորոշումը։